Без попис нема доверба во избирачкиот список

Пописот на населението е исклучително значајна операција за една држава и тој ни оддалеку не се исцрпува со етничкото пребројување на населението. За статистичарите и демографите, пописот претставува најобемнa и најсложена статистичка операција, која се спроведува според препораките на Обединетите нации (ООН) и Евростат. Целта на пописот е да обезбеди целосни, квалитетни и реални податоци за населението, домаќинствата и живеалиштата. 

Македонија е единствена држава во Европа која нема спроведено попис веќе 13 години. Неговото натамошното одложување штетно влијае врз угледот на државата, но уште повеќе го оневозможува планирањето и спроведувањето успешни развојни политики во сите сфери на општеството. Без попис нема успешни политики во економијата, енергетиката, инфраструктурата, здравството, образованието, социјалата, руралниот и регионалниот развој, земјоделството. Исто така, пописот претставува и основен предуслов за реален избирачки список.

За тоа говори и претседателот на Државната изборна комисија, Никола Рилкоски.

Зошто пропадна пописот во 2011 година?

- По мое лично убедување, сметам дека пописот пропадна поради политички причини. На некого не му одговараше. Оние кои требаше да го спроведат, за жал, одлучија пописот да почне и експресно да заврши.

Што губи државата од тоа што нема попис?

- Пописот нуди можност да се види колкаво население живее тука, а колку е иселено. Исто така, нуди можност да се види застапеноста на другите националности, па и родовата и имотната состојба на граѓаните. Иако сите овие параметри се променети од последниот попис, ние сè уште немаме можност тоа и официјално да го потврдиме.

Како немањето попис влијае врз работата на Државната изборна комисија?

 

- Кога би имало попис би имале подобра и посериозна слика на луѓето кои имаат право да гласаат. Постои недоверба во избирачкиот список. Ние не можеме да ја вратиме довербата во избирачкиот список доколку нема попис.

Дали сметате дека постојат алтернативни начини за собирање на важните податоци кои можат да го надополнат недостатокот на пописот?

- Можеби и можат да го надополнат пописот, но тоа не е тоа. Пописот е она вистинското бидејќи и институциите кои вршат некое свое согледување на бројките, се случува често да излегуваат со различни податоци. Така што веродостојноста на податоците не е ни одблиску точна како онаа на пописот.

Ова интервју е дел од проектот „Пописот е демократија, а не само етничка бројка!“, кој има за цел да ја поттикне јавната дебата и да го засили јавниот притисок врз власта, за нужноста од спроведување попис на населението во Република Македонија. Проектот го реализираат НВО Инфоцентар, Македонски центар за европско образование, 8-ми Септември и Центар за развој на медиуми. 

Дополнителни информации за значењето на пописот, за тоа зошто пропадна пописот во 2011 година, како и за активностите реализирани во кампањата, може да најдете на интернет-страницата: www.popis.mk